صورتك ، أبيات شعرك والحنين ..
والغياب اللي خنق الأنفاس فيني ،

وين حبّك : لهفتك راحت لـ وين !
وين قلبٍ في غيابي يحتريني .. ؟

ألف معنى : في أغاني العاشقين ..
لا سمعته ، هزّني شوقي وحنيني

في غيابك : عاندتني هـ السنين ،
تقتل البسمة وتهديني : أنيني !

في غيابك : ما بقى لـ الدمع عين
يا كثر دمعي ولكن وين عيني ؟

في غيابك : حتّى [ زهر الياسمين ]
خان عطره ، وذْبلت أجمل سنيني

بانت اللهفة على وجهي الحزين
والألم في غيبتك دايم يجيني /

ما أخونك والله وأقسم لك يمين ،
ما يفرّق هـ الهجر بينك وبيني ..

مدّ لي كفّك ، وصافحني إلين
ينتهي حزني وتدفا بك يديني ،

صون وعدك وإقطع الشك بـ يقين
كذّب ظنوني وقول إنّك : تبيني ..!